Rannsókn Árnu Benediktsdóttur, nýútskrifaðs byggingartæknifræðings frá HR og sérfræðings í innivist og loftgæðum hjá VERKVIST gefur til kynna mun á loftgæðum milli hefðbundinna skrifstofa og heimavinnuumhverfis. Loftgæðin voru almennt breytilegri og óheilnæmari á heimaskrifstofum. f Árna Benediktsdóttir, byggingartæknifræðingur Árna Benediktsdóttir er nýútskrifuð með BS-próf í byggingartæknifræði frá Háskólanum í Reykjavík. Hún hefur verið í hlutastarfi hjá VERKVIST frá því að fyrirtækið var fyrst stofnað en hún var fyrsti starfsmaðurinn inn í fyrirtækið eftir að það var stofnað í mars 2024. Árna hefur nú hafið fullt starf hjá VERKVIST.   Lokaverkefni Árnu „ Samanburður á loftgæðum á vinnustöðum og í heimahúsum “, hlaut tilnefningu sem eitt af fjórum bestu lokaverkefnum annarinnar í tæknifræði við HR. Leiðbeinendur hennar voru þau Sylgja Dögg Sigurjónsdóttir , líffræðingur, lýðheilsufræðingur og eigandi VERKVISTAR og Dr. Ólaf­ur H. Wal­levik hjá Há­skóla Reykja­vík­ur.   Mælingar voru gerðar á helstu þáttum sem hafa áhrif á inniloft, m.a. styrk koltvísýrings (CO₂), magni rokgjarnra lífrænna efnasambanda (VOC e. volatile organic compounds), hitastigi og hitasveiflum, raka sem og magni svifryks í andrúmsloftinu. Niðurstöður verkefnisins sýndu fram á mun á loftgæðum. Á hefðbundnum skrifstofum var koltvísýringur yfirleitt innan viðmiðunarmarka, á meðan hann mældist oft yfir mörkum í heimahúsum vegna takmarkaðrar loftræstingar. Einnig voru gildi rokgjarnra lífrænna efnasambanda (VOC) að jafnaði lægri á vinnustöðum sem búa yfir öflugri loftræstingu, en hærri í heimahúsum. Hitastig var yfirleitt stöðugra og jafnara á skrifstofum en í heimaskrifstofum, og magn svifryks reyndist oft meira í heimahúsum.  „Heimavinnuumhverfið felur í sér fleiri áskoranir hvað varðar loftgæði en hefðbundnir vinnustaðir sem treysta á vélræna loftræstingu“ segir Árna og leggur áherslu á ályktun rannsóknarinnar. „Því er brýnt að auka vitund um loftgæði heima fyrir og grípa til aðgerða til að viðhalda heilnæmu lofti, til dæmis með reglulegri loftun og réttri loftræstingu.“ Áhugasviðið liggur á sviði loftgæða og innivistar   Hjá VERKVIST mun Árna nýta sína sérþekkingu á þessu sviði. Hún mun einbeita sér að málefnum sem varða loftgæði og heilnæma innivist. Árna hefur öðlast umtalsverða reynslu sl. ár af störfum sínum samhliða námi bæði hjá VERKVIST og áður hjá Eflu, Colas við gæðaeftirlit og HR í námi við byggingartækni. Hún var einnig aðstoðarkennari í jarðtækni hjá HR árið 2022-2023.   „Ég er mjög stolt af því hvernig hún vann verkefnið og rannsóknina en þekkingin mun nýtast okkur áfram til frekari rannsókna og við ráðgjöf. Með ráðningu Árnu í fullt starf eflum við enn frekar sérfræðiþekkingu VERKVISTAR á sviði loftgæða og innivistar. Við fögnum útskrift hennar“, segir Sylgja Dögg Sigurjónsdóttir, einn af eigendum VERKVISTAR. Lokaverkefnið og rannsóknina í heild sinni má finna á vef Skemmunnar

Glæsileg ný 436 íbúða byggð rís nú á Orkureitnum við Suðurlandsbraut í Reykjavík. Byggðin er í göngufæri við Laugardalinn, Skeifuna, Glæsibæ og Múlana. Íbúðirnar eru með loftræsingu með varmaendurvinnslu sem stuðla að orkusparnaði og betri loftgæðum. VERKVIST leiðir Svansvottun á Orkureitnum. Vottunarferlið  tekur mið af nýjasta staðli Svansins, sem er fjórða útgáfa .   Eiginleikar og áherslur í Svansvottun á Orkureitnum   Dagsbirtuútreikningar : Lausnir sem tryggja nægilegt magn dagsbirtu.   stækka og færa til glugga til að hámarka náttúrulega ljósvist. Þessar breytingar tryggja ekki aðeins fullnægjandi dagsbirtu sem eykur vellíðan íbúa heldur stuðla þær einnig að orkusparnaði. Loftgæði: Allar íbúðir á Orkureitnum eru búnar loftræsingu með varmaendurvinnslu. Efnisval tekur mið af kröfum Svansins varðandi útgufun efna og efnainnihald. Þessir þættir tryggja betri innivist og loftgæði. Rakaöryggi:  Sérfræðingar VERKVISTAR leggja áherslu á rakaöryggiseftirlit. Kröfur Svansvottunar í rakaforvörnum tryggja að fylgst er með uppbyggingu og framkvæmd samkvæmt rakaöryggisáætlun verkefnisins. Efnisval: Í Svansvottun er lögð áhersla á val á umhverfisvænum  efnum sem innihalda ekki eitruð eða skaðleg efni fyrir vistkerfi eða inniloft. Orkusparnaður : Í hönnunarferlinu er lögð áhersla á orkusparandi aðgerðir og lausnir sem skila sér í langtíma orkusparnaði sem er umfram það sem reglugerð kveður á um. Betri einangrun, vandaðri gluggar og lýsingarhönnun eru dæmi um orkusparandi aðgerðir. Loftræsikerfi með varmaendurvinnslu: Til að bæta enn frekar loftgæði innan íbúða og spara um leið bæði orku og halda niðri kostnaði við upphitun, er ferskt og kalt loft dregið inn í bygginguna og hitað með lofti sem skilað er til baka. Þessi varmaskipti leiða af sér lægri upphitunarkostnað. Líffræðilegur fjölbreytileiki:  Líffræðilegur fjölbreytileiki  gegnir lykilhlutverki í að viðhalda virkni og jafnvægi vistkerfa. Hann styður við vistkerfi og ferla, eins og frjóvgun plantna, vatnshreinsun, jarðvegsmyndun, vatnsmiðlun og kolefnisbindingu, auk þess að draga úr áhrifum loftslagsbreytinga og styðja við sjálfbærni. Ávinningur af Svansvottun fyrir íbúðareigendur:   Markmiðið með Svansvottun á Orkureitnum er að efla sjálfbærni við hönnun og skipulag og þannig draga úr umhverfisáhrifum og minnka þörf á viðhaldi.   Þeir sem eiga eða búa í Svansvottaðri íbúð mega búast við því að loftgæðin séu betri, rakaöryggið sé meira og efnisvalið sé heilnæmt og vistvænt. Eftirlit er haft með rakaöryggi í framkvæmd, raki mældur í byggingarefnum á byggingartíma og áður en gólfefni eru lögð. Gluggar eru prófaðir fyrir slagregni og hvernig þeir standast veðurálag. Einnig hefur farið fram greining á orkunýtingu og dagsbirtu. Loftskipti eru tryggð með loftræsikerfi fyrir hverja íbúð og varmaendurvinnsla tryggir orkusparnað.   VERKVIST hefur viðamikla reynslu af því að aðstoða og veita ráðgjöf vegna Svansvottunar til m.a. hönnuða, verktaka, stofnanna og sveitarfélaga. VERKVIST hefur komið að Svansvottun á öllum stigum í byggingaferlinu, allt frá gerð útboðsgagna og kostnaðaráætlana, aðstoða hönnuði í hönnunaferlinu ástamt ráðgjöf, eftirliti og aðstoð á framkvæmdatíma. Einnig veitum við ráðgjöf og þjónustu við eftirfarandi: - Rakaöryggisráðgjöf og eftirliti - Lífsferilsgreiningum LCA - Orkuútreikningum - Dagsbirtugreiningum - Ráðgjöf við efnisval -Slagregnsprófun -Loftþéttleikamælingar -Rakamælingar -Byggingareðlisfræðilega rýni Við í VERKVIST teljum að sjálfbærni og heilnæmi þurfi að vera samverkandi við hönnun og framkvæmd í nýbyggingum. Mikilvægt er að byggingar endist, að þær hafi sem minnst áhrif á umhverfið auk þess að stuðla að heilsu og vellíðan íbúa. Svansvottun er góð leið til þess að tryggja að svo sé.

Miklu máli skiptir að líða vel í vinnunni og er það ekki sjálfgefið. Við starfsfólk VERKVISTAR  teljum okkur svo sannarlega heppin hvert með annað. Við deilum ástríðu fyrir umhverfinu og því sem við vinnum við og ekki skemmir fyrir hvað starfsmannafélagið FÉLAGSvist er öflugt. Frá því að fyrirtækið var stofnað þann 1. mars sl. er óhætt að segja að margt hafi gerst. Við erum orðin 13 talsins, erum flutt í frábæra aðstöðu á Hallgerðargötu 13 og höfum átt í samstarfi við frábæra samstarfsfélaga og viðskiptavini. Þjónustuleiðum okkar fjölgar með hverju fagfólkinu sem við fáum inn í teymið okkar og félagslífið eflist. Verkefnin eru af ólíkum toga en þau tengjast öll heilnæmi bygginga: innivist, vistvottun, byggingartæknifræði, loftgæðum, sjálfbærni, rakaöryggi og forvörnum. Samhliða því að vinna saman að krefjandi verkefnum höfum við haft það að leiðarljósi að vera þétt teymi sem hjálpast að. Þannig náum við oft að leysa flókin mál saman. Hjá okkur skipar fjölskyldan stóran sess og við elskum að gleðjast saman. Margt skemmtilegt hefur verið gert á þó þessum stutta tíma og má þá m.a. nefna: pílu, pool, sýningar, innflutningsboð, jólahlaðborð, bingó, pubquiz, jólaföndur, Áramótaskop og svo margt annað. Hér er ekki hægt að sleppa því að tala um MATARvistina en við höfum skipst á að velja og panta saman mat í hádeginu á föstudögum og fara yfir málin. Svo svarið við spurningunni hér að ofan er risa stórt JÁ… það eru forréttindi að vinna með góðu fólki. Hjálpsemi, góðlátlegt grín eða gott klapp á bakið getur breytt deginum. Starfsfólkið þakkar fyrir árið, stjórnendum, samstarfsfélögum og viðskiptavinum. Við hlökkum til ársins 2025 og nýrra ævintýra. F. H starfsmannafélags VERKVISTAR, FÉLAGSvist

Í dag, 1. mars fögnum við hjá VERKVIST tímamótum– 1 árs afmæli fyrirtækisins! Árið hefur verið ótrúlegt, fullt af lærdómi, nýjum tækifærum og krefjandi en jafnframt skemmtilegum verkefnum. Við viljum nýta tækifærið og þakka öllum sem hafa stutt okkur á þessari vegferð. Við brugðum okkur í óvissuferð og fögnuðum áfanganum. Um VERKVIST VERKVIST var stofnað með það að markmiði að veita faglega og áreiðanlega þjónustu á sviði bygginga, ráðgjafar, innivistar, vottanna, loftgæðamælinga og í raun allt sem tengist heilnæmum byggingum og heilsu. Teymið - samheldinn hópur  Við höfum lagt okkur fram við að byggja upp sterk tengsl við viðskiptavini okkar og bjóða upp á fjölbreyttar lausnir. Á þessu fyrsta ári höfum við veitt fjölbreytta þjónustu sem hefur hjálpað fyrirtækjum, stofnunum og einstaklingum að halda byggingum sínum heilnæmum og huga að umhverfisþáttum. Við leggjum áherslu á þverfaglega nálgun, skilvirkni og persónulega þjónustu. Við vinnum þétt saman að lausnum til að tryggja faglega þjónustu. Mannauður VERKVISTAR Hvað er framundan? Við höfum stór markmið fyrir næsta ár. Við erum búin að ráða inn fjórtánda starfsmanninn, Einar Örn Þorvaldsson og kynnum við hann nánar til leiks á næstu dögum. Við stefnum á að auka þjónustuframboð okkar, þróa nýjar lausnir og efla samstarf við viðskiptavini enn frekar. Við hlökkum til að halda áfram að vaxa og þróast með ykkur. Að lokum viljum við þakka öllum viðskiptavinum, samstarfsaðilum og teyminu okkar fyrir traustið og stuðninginn. Án ykkar væri þetta ekki mögulegt! Takk fyrir fyrsta árið – hlökkum til næstu ára! Starfsfólk VERKVISTAR

Í síðustu viku fengum við til okkar sérfræðinga frá Hornsteini þar sem Sigríður Ósk Bjarnadóttir eða Sirrý, framkvæmdastjóri umhverfis- og gæðamála, hélt kynningu fyrir starfsfólk VERKVISTAR um starfsemi og sérþekkingu fyrirtækisins. Með henni í för voru samstarfskonur hennar þær Anna Bára og Sóley. Hornsteinn er móðurfélag þriggja dótturfélaga: BM Vallár, Sementsverksmiðjunnar og Björgunar, sem öll eiga sér rótgróna sögu á Íslandi. Hornsteinn og VERKVIST eiga það sameiginlegt að byggja starfsemi sína á heilindum í íslenskum byggingariðnaði, þar sem gæðakröfur til endingar byggingarefna og þjónustuvitund skipta höfuðmáli. Umhverfismál og sjálfbær nýting auðlinda eru okkur hjartans mál, og við leitum stöðugt leiða til að hafa jákvæðari áhrif á umhverfið, bæði til skemmri og lengri tíma. Sirrý var með mjög góða fræðslu varðandi steypu og framleiðsluferlið hjá samsteypunni. Á fundinum var rætt um leiðir til að minnka kolefnisspor í byggingariðnaði, losun byggingarefna, LCA-greiningar, EPD-blöð, vistvæna steypu, efnakvörðun og margt fleira. Það er dýrmætt að deila þekkingu og reynslu með öðrum. Við þökkum starfsfólki Hornsteins kærlega fyrir komuna og hlökkum til að miðla þekkingu okkar áfram til iðnaðarins. Svo lengi lærir sem lifir...

🌟✨ Kraftur, sköpun og vinátta!   Í dag fögnum við öllum konum í lífi okkar – mæðrum, systrum, vinum og samstarfskonum. 🌸 Strákarnir hjá VERKVIST gleymdu okkur svo sannarlega ekki og sendu okkur heim með glaðning til að njóta um helgina. Í tilefni dagsins eru hér nokkrar skemmtilegar staðreyndir sem haldið hefur verið fram um konur: 👀 Tjáning á augnblikkum:  Konur blikka nær tvöfalt oftar en karlar! Þær hafa einnig lag á að bræða þig með því að setja upp „panda- eða hvolpaaugu" ef allt um þrýtur. 🎉 Félagsverur:  Konur eru einstakar í að stofna og viðhalda vinahópum. Þær sækja í að verja allt að 50% frítíma sínum í félagsskap og tengslamyndun. 🎨💃 Listastelpur:  Konur hafa verið í fararbroddi í listum, allt frá Frida Kahlo til Beyoncé! Sköpunin er í blóðinu! 🤗 Sjálfboðaliðar:  Konur leggja nánast tvöfalt meiri tíma í sjálfboðavinnu en karlar. Hugsjónir hafa kraft! 🍽️ Skynjun:  Konur skynja bragð, lykt og liti betur en karlar! Rúmlega 40% kvenna hafa fundið upp á nýjum réttum til að elda heima. Bon appétit! Í dag er góð áminning um að styðja aðra – sýnum hvort öðru virðingu, gefum blóm, eða bara bros og knús sem kostar ekkert! 🌼 Eitt bros getur dimmu í dagsljós breytt 🌈 Bestu kveðjur, Starfsfólk VERKVISTAR

Vatnstjón getur valdið miklum skemmdum á byggingum. Hér eru helstu atriðin sem hafa þarf í huga til að verjast vatnstjóni og bregðast rétt við í óveðri. Veðurspá: Fylgstu með veðurspám og gerðu ráðstafanir ef óveður er væntanlegt. Þakrennur og niðurföll:  Hreinsaðu þakrennur og niðurföll. Gluggar og hurðir:  Gættu þess að vatn komist ekki inn um glugga og hurðar og skoðaðu vel þéttingar. Lausir hlutir:  Fjarlægðu lausa hluti úr garðinum, svölum eða palli til að það valdi ekki skemmdum á eignum. Það lekur hjá mér núna - hvað á ég að gera? Loftræsting:  Almennt gildir að loftræsting er gríðarlega mikilvæg til að raki safnist ekki upp og valdi á endanum umfangsmiklu tjóni. Hleyptu rakanum út:  Ef vatn kemur inn er mikilvægt að hleypa rakanum út, fjarlægja blaut byggingarefni og þurrka vel. Aðgát við hreinsun:  Ef vatn hefur komist undir gólfefni er mikilvægt að hafa gát á þegar verið er að hreinsa með því að afmarka svæðið og nota rétt efni til að gæta þess að valda ekki frekari skemmdum. Þurrkun byggingarefna:  Gott getur verið að smella parketlistum frá, lyfta upp parketi í slæmum tilfellum og þurrka. Mygla hefur myndast - þarf ég aðstoð?:  Hafa ber í huga að ef vatn hefur lekið oft inn eða til lengri tíma þarf að huga að hvort mygla eða aðrar bakteríur hafi náð að vaxa í eða undir byggingarefnum, undir gólfefnum, límum og þess háttar. Í þeim tilfellum sem mygla hefur myndast mælum við eindregið með að leita aðstoðar fagmanna, láta skoða eignina og rakamæla til að koma í veg fyrir að gró frá myglu dreifi sér frekar. Ef rétt er brugðist við er hægt að varna frekari tjóni og skemmdum á innanstokksmunum og öðru byggingarefni. Forvarnir Slagveðurspróf:  Ef vatn kemur inn til þín í slagviðri gefur það mjög góða vísbendinu um frekari skoðun og viðbragða. Slagveðurspróf framkvæmd af fagmönnum hafa reynst mjög vel til að finna helstu veikleika í byggingunni, glufur og skort á þéttingum. Þak:  Skoðaðu þakið reglulega, hreinsaðu þakrennur og niðurföll og gættu að þéttingum í kringum lofttúður og öðrum búnaði á þakinu. Veggir og gluggar:  Athugaðu hvort það séu sprungur eða skemmdir í útveggjum, í klæðningu eða málning komin á tíma. Tryggðu að gluggar og hurðar séu vel þéttar. Loftræsting:  Loftræstu vel, sérstaklega baðherbergi og eldhús. Athugaðu hvort loftræstikerfið virki vel. Þurrka þarf úr gluggum þar sem raki safnast upp þegar hús eru ekki loftræst. Pípulagnir:  Athugaðu pípulagnir reglulega með tilliti til leka og skemmda og hreinsaðu frárennslisrör. Geymsla og bílskúrar:  Notið hillur til að geyma dót til að ekki myndist raki frá botnplötu eða veggjum. Þetta á sérstaklega við niðurgrafin rými. Best er að þung húsgögn liggji ekki alveg upp að útveggjum. Í öllum tilfellum um leka þarf að skoða af hverju vatnið komst inn og gera úrbætur á þéttingum og fyrirbyggja að það gerist ekki aftur. Hafðu samband við fagaðila Ef þú finnur eitthvað athugavert sem krefst frekari skoðunar eða aðstoðar hafðu samband við fagaðila. Við hjá VERKVIST veitum fjölbreytta þjónustu : Ástandsskoðanir, slagveðursprófanir, loftgæðamælingar, sýnatöku, ráðleggingar um viðhald, byggingatækni, endurbætur, forvarnir, vottanir og í raun allt sem tengist heilnæmi bygginga og innilofts. Við vinnum einnig þétt með örðum fagaðilum og húseigendum og getum komið inn á öllum stigum málsins. Sjá nánar á vefsíðu okkar www.verkvist.is Beiðni um ástandsskoðun: skodun@verkvist.is Beiðni um almenna ráðgjöf: verkvist@verkvist.is   VERKVIST verkfræðistofa Hallgerðargata 13, 105 Reykjavík Sími: 419 1500

Það er okkur sönn ánægja að tilkynna að Helga María Adolfsdóttir , byggingarfræðingur með sérhæfingu í sjálfbærni og lífsferilsgreiningum, hefur gengið til liðs við VERKVIST. Frétt um það birtist á vef Viðskiptablaðsins í dag Frá vef Viðskiptablaðsins Helga María lauk B.Sc . gráðu í byggingarfræði frá UCL University College í Danmörku þar sem hún sérhæfði sig í lífsferilsgreiningum (LCA) í lokaverkefni sínu. Helga hefur aflað sér víðtækrar reynslu og þekkingar bæði hérlendis og í Danmörku á sviði byggingariðnarins frá árinu 2019. Hún hefur unnið að fjölbreyttum verkefnum á sviði byggingarfræðinnar, umhverfismála, sérfræðiráðgjöf, starfað við kennslu, vistvottanir og loftgæði um árabil. „Það er mikill styrkur fyrir okkur og heiður að fá Helgu Maríu í hópinn. Hún hefur einstaka þekkingu og reynslu á sviði sjálfbærni og lífsferilsgreininga sem mun nýtast við fjölbreytt verkefni okkar,“ segir Alma Dagbjört Ívarsdóttir, framkvæmdastjóri og einn af eigendum VERKVISTAR. Dæmi um ráðgjöf og þjónustu sem Helga María og sviðið mun veita: Lífsferilsgreiningar Kolefnisspor Vottanir (BREEAM og Svanurinn) Sjálfsbærnisráðgjöf Byggingareðlisfræði Endurnýting byggingarefna Hringrásarhagkerfi Rakavarnareftirlit fyrir vistvottanir „Markmið mitt er að draga úr umhverfisáhrifum bygginga á öllum stigum lífsferils þeirra. Í því felst að lágmarka kolefnisspor, kostnað, orkunotkun byggingarinnar og hafa á heildstæðan hátt jákvæð áhrif á hönnun og framkvæmd bygginga sem og líftíma þeirra,“ segir Helga María. Nánari upplýsingar um Helgu Maríu og þjónustuna má finna á starfsmannasíðu okkar. Við bjóðum hana hjartanlega velkomna í hópinn.

Vincent E. Merida hefur starfað með VERKVIST undanfarna mánuði í verkefnum tengdum lífsferilsgreiningum og gerð umhverfisyfirlýsinga, fyrst í hlutastarfi meðfram doktorsnámi en við vorum svo lánsöm að hann skrifaði undir samning við okkur nú í október um fullt starf. Um Vincent Vincent er með bakgrunn í hagfræði og lífsferilsgreiningum tengdum orkumálum, matvælakerfum og öðrum innviðum. Ástríða hans fyrir sjálfbærni hófst í Kaliforníu þar sem hann starfaði í sólarorkuiðnaðinum og stofnaði umhverfisvæna garðyrkjuþjónustu. Síðustu árin hefur hann verið í doktorsnámi í umhverfis- og auðlindafræði hjá Háskóla Íslands með áherslu á lífsferilsgreiningar ásamt því að vera rannsakandi, stundarkennari og fyrirlesari fyrir meistaranemendur í HÍ. Vincent hefur birt ritrýndar greinar í ýmsum fagritum og haldið fjölda fyrirlestra á innlendum og alþjóðlegum ráðstefnum. Þar með hefur hann öðlast verðmæta reynslu og þekkingu á sviði sjálfbærni með áherslu á lífsferilsgreiningar, orku- og matvælakerfi. Enn annar gullmolinn í teymið okkar „Það er ómetanlegt að fá Vincent til okkar en með því styrkjum við stöðu okkar á sviði umhverfismála og sjálfbærni á alþjóðavettvangi. Samhliða vinnu sinni hjá Verkvist er Vincent að ljúka doktorsnámi við Háskóla Íslands“, segir Alma Dagbjört Ívarsdóttir, framkvæmdastjóri og einn af eigendum VERKVISTAR. Vincent E. Merida og Alma Dagbjört Ívarsdóttir Lífsferilsgreiningar verður senn krafa í nýbyggingum Helstu verkefni Vincents hjá VERKVIST eru m.a.: lífsferilsgreiningar og umhverfisyfirlýsingar fyrir vörur (EPD blað) fyrir íslenska og erlenda framleiðendur. En töluverð aukning hefur verið á verkefnum í lífsferilsgreiningum bygginga undanfarið, þá aðalega verkefnum tengd við umhverfisvottanir bygginga þar sem slíkar greiningar eru skylda. Búast má við ennþá meiri aukningu verkefna árið 2025 en frá og með 1. september verður skylda að gera lífsferilsgreiningar fyrir nýbyggingar til að fá byggingarleyfi og lokaúttekt. Niðurstöður úr umhverfisyfirlýsingum fyrir vöru (EPD-blaða) nýtast svo vel þegar slíkar lífsferilsgreiningar eru framkvæmdar fyrjr byggingar og verður forskot fyrir framleiðendur að eiga umhverfisyfirlýsingu fyrir sína vöru. Vincent er einmitt um þessar mundir að ljúka við fyrstu umhverfisyfirlýsinguna (EPD-blað) fyrir vöru frá Límtré Vírnet. Við komum til með að segja nánar frá því síðar í samvinnu við fyrirtækið en stefnt er á útgáfu blaðins í janúar 2025. „Með ráðningu Vincents inn í teymið okkar styrkjum við stöðu okkar og kemur hann sterkur inn í ýmis verkefni tengd m.a. líftímakostnaðargreiningum, EU taxonomy, umhverfisvottunum bygginga með öflugan bakgrunn, menntun og þekkingu “, segir Alma. Nánar um Vincent E. Merida má lesa á vefnum okkar. Önnur verkefni Vincents hjá VERKVIST eru: líftímakostnaðargreiningar, EU taxonomy, umhverfisvottanir bygginga og í raun allt sem tengist sjálfbærni og umhverfismálum. Vincent E. Merida, umhverfis- og auðlindafræðingur hjá VERKVIST

Við hjá Verkvist höfum átt ógleymanlegt fyrsta starfsár og nýlega héldum við innflutningsjólaboð til að fagna þeim áfanga og flutningum í nýjar starfsstöðvar. Boðið var vel sótt af viðskiptavinum, samstarfsfélögum, vinum og ættingjum sem tóku sér tíma til að eiga góða stund með okkur. Þar var rætt um þjóðmál og byggingar yfir ljúffengum veitingum eins og smurbrauði, piparkökum, mandarínum og jólaöli. Svei mér þá ef þetta verður ekki árlegt!   Það er okkur sannarlega gleði- og þakkarefni að segja frá því að frá því við byrjuðum þrjú saman 1. mars, verðum við orðin 13 starfsmenn um áramót – rétt eins og jólasveinarnir! Það er einstaklega viðeigandi á þessum hátíðartíma, og við erum þakklát fyrir þann mikla stuðning og traust sem við höfum fengið.   Við erum einstaklega lánsöm að deila leigu að nýju, glæsilegu húsnæði okkar við Hallgerðargötu með nokkrum framsæknum fyrirtækjum, eins og til dæmis, Líf byggingar og 3H. Þetta gerir okkur kleift að njóta framúrskarandi innivistar, stórkostlegs útsýnis og hagkvæmrar aðstöðu. Sambýlið skapar lifandi og skemmtilegt andrúmsloft þar sem dagarnir eru bæði fjölbreyttir og skapandi – fullkomin blanda af vinnu og gleði!   Á þessum tímamótum viljum við ekki aðeins horfa til baka, heldur líka til framtíðar. Við óskum landsmönnum gleðilegra jóla og farsæls nýs árs, með þá von í brjósti að byggingariðnaðurinn haldi áfram að þróast í átt að heilnæmari og vistvænni byggingum – fyrir lýðheilsu þjóðarinnar og umhverfi okkar allra.   Kærar þakkir fyrir góðar viðtökur á árinu sem er að líða – saman gerum við góðar hugmyndir að veruleika!   – Jólakveðjur frá jólasveinum VERKVISTAR Jólasveinar VERKVISTAR og Líf bygginga búa saman í Hallgerðargötu 13

Í starfsnámi sínu hjá VERKVIST fékk Heiðdís tækifæri til að taka þátt í fjölbreyttum verkefnum sem snúa að greiningu og úrbótum á rakaástandi bygginga. Hún framkvæmdi loftþéttleikamælingar, slagregnspróf á gluggum, rakamælingar í botnplötum og rakaskimun húsnæðis. Einnig tók hún DNA-sýni til að meta rakaástand og myglu, auk þess að vinna með byggingarefnissýni. Til viðbótar lagði Heiðdís sitt af mörkum í að uppfæra og fara yfir gæðakerfi VERKVISTAR þar sem stefnan er að fá það vottað á nýju ári. Hún sýndi bæði fagmennsku og metnað, í takti við kjarnagildi VERKVISTAR þar sem er lögð áherlsa á samvinnu, fagmennsku og framsækni. Við þökkum Heiðdísi fyrir frábært samstarf og óskum henni alls hins besta í framtíðinni. Við vitum að hún á eftir að ná langt á sínu sviði.

„Við erum mjög lukkuleg að hafa fengið til liðs við okkur Orku- og efnaverkfræðinginn Jóhannes Ólafsson en hann hóf störf hjá VERKVIST í október. Jóhannes Ólafsson er með bakgrunn í landbúnaði og byggingariðnaði. Hann er með háskólamenntun á sviði raunvísinda, reynslu af húsasmíði, akademískum vinnubrögðum og að vinna út frá verkfræðilegu sjónarhorni. Jóhannes útskrifaðist með B.Sc. gráðu í Efnaverkfræði frá Háskóla Íslands árið 2020. Hann lauk einnig mastersgráðu í Sjálfbærri Orkuverkfræði frá HR árið 2023 með áherslu á nýtingu jarðvarma. Áður hafði hann lokið sveinsprófi í Húsasmíði frá Fjölbrautaskóla Vesturlands. Jóhannes hóf störf hjá VERKVIST í október en af fyrri störfum hefur hann öðlast reynslu af sjálbærni bókhaldi (ESG), umsóknarferli fyrir Svansvottun m.a. metangass og umhverfisstefnu fyrirtækja. Hann hefur einnig komið að ýmsum verkefnum tengdum landbúnaði fyrir sveitarfélög, gæðamálum, innleiðingu hringrásarhagkefis á höfuðborgarsvæðinu o.fl. Sérstaða Jóhannesar hjá VERKVIST verður sýnataka á menguðum jarðvegi, efnum, orkumálum og vottunum. Hann kemur til með að starfa þvert á sviðin okkar tengdum umhverfi og sjálfbærni, byggingartækni, innivist og áhrifa umhverfisins á heilnæmi manna og dýra, segir Sylgja Dögg Sigurjónsdóttir. Við erum gríðarlega ánægð með af fá Jóhannes inn í þétt teymi sérfræðinga okkar og munum við kynna nýja þjónustu á næstu dögum því tengdu. Jóhannes er 14 starfsmaður okkar síðan fyrirtækið var stofnað í mars 2024. Nánar má lesa um Jóhannes Ólafsson og verkefni á vefsíðu okkar. Myndatexti: Sylgja Dögg Sigurjónsdóttir, Hlynur Júlíusson, Hulda Einarsdóttir, Jóhannes Ólafsson og Vincent E. Hluti af teyminu fönguðu Jóhannes á eina mynd á nýju skrifstofunni á Hallgerðargötu 13, 5 hæð.