Í síðasta mánuði fór starfsfólk VERKVISTAR í vettvangsferð í Hamranes í Hafnarfirði þar sem nýtt hjúkrunarheimili er að taka á sig mynd. Húsið er að mestu forsmíðað úr 111 stálhúseiningum sem eru fluttar sjóleiðis frá Póllandi til Hafnarfjarðar, hífðar á sinn stað og boltaðar saman. Einingarnar eru engin smásmíði en hver þeirra er um 17 metrar á lengd og vegur um 30 tonn. Í flestum einingum eru tvö fullbúin hjúkrunarrými, sitt í hvorum endanum. Hvert hjúkrunarrými er 28 m² einbýli með stofu, svefnaðstöðu, baðherbergi og eldhúsinnréttingu. Húsinu er skipt í níu heimiliseiningar en í hverri einingu er setustofa, borðstofa og eldhús. Á jarðhæð verða sameiginleg rými á borð við fjölnotasal, sjúkraþjálfun og hárgreiðslustofu. Vestan við húsið er garður sem sést frá öllum deildum. Framkvæmdir hafa gengið hratt. Jarðvinna hófst í febrúar og fyrri sending eininga kom til landsins í september. Samkvæmt áætlun verður húsið fullreist í byrjun nóvember og verklok eru áætluð 1. mars 2027. Aðalhönnuður er ARKÍS arkitektar og Íslenskar fasteignir annast framkvæmdir og byggingarstjórn. VERKVIST hefur unnið náið með verkefnateyminu allt frá frumhönnunarstigi sem BREEAM-matsaðili, en stefnt er að vottuninni „Very Good“. Við stýrum gagnasöfnun ásamt forgangsröðun og skipulagningu aðgerða svo verkefnið nái umhverfismarkmiðum sínum. VERKVIST sér einnig um orkuútreikninga fyrir bygginguna. Þeir sýna að hönnun hússins dregur verulega úr orkunotkun og kolefnislosun í rekstri, samanborið við lágmarkskröfur byggingarreglugerðar.

Undanfarið hefur verið mikil umræða um viðveru á vinnustöðum, veikindi og áhrif þeirra á rekstur fyrirtækja og stofnana. Umræðan snýst gjarnan um stjórnun, skipulag og menningu, en einn þáttur fær mun minni athygli: vinnuumhverfið sjálft og innivistin. Vellíðan og frammistaða starfsfólks ræðst ekki aðeins af stjórnun. Rannsóknir sýna að loftgæði, loftræsing og hitastig hafa marktæk áhrif á einbeitingu, hugræna frammistöðu og afköst (1,2,3). Þegar starfsfólki líður illa í vinnuumhverfi sínu, hvort sem það lýsir sér í þreytu, ertingu eða skertri einbeitingu, hefur það bein áhrif á framleiðni og mætingu (4). Skert framleiðni hjá starfsfólki sem mætir en líður ekki vel (e. presenteeism) getur verið stærri hagræn byrði fyrirvinnustaði en bein fjarvera (5). Þetta undirstrikar að vinnuumhverfið sjálft þarf að vera hluti af lausninni, ekki aðeins viðveruskráning og stjórnun. Grein á Vísi: Við­vera, frammi­staða og vel­líðan á vinnu­stöðum: Við búum á Ís­landi – og þurfum að vinna með það - Vísir „Loftið er svo þurrt" – en við höfum ekki skynfæri fyrir raka Ein algengasta athugasemd á íslenskum vinnustöðum yfir vetrarmánuðina er að loftið sé „þurrt". Þessa athugasemd ber að taka alvarlega, en hana þarf að skoða í réttu samhengi. Fólk hefur ekki skynfæri fyrir raka. Það sem við köllum „þurrt loft" er upplifun og hún á sér oft fleiri skýringar en rakamagn eitt og sér. Svipuð einkenni, þurrkur í augum, erting í nefi og hálsi, þreyta, höfuðverkur og skert einbeiting, koma einnig fram þegar eitthvað annað er að í inniloftinu: efnamengun, svifryk og örfínar agnir, ófullnægjandi loftskipti eða rakaskemmdir í húsnæði. Rannsóknir sýna að upplifun af þurrki og ertingu getur verið margs konar og er ekki einungis háð raka (6,7). Raki eða þurrkur í íslensku loftslagi Íslenskt loftslag er kalt og rakamagn útilofts mjög lágt yfir veturinn. Hlutfallsraki í frosti er um 75-80 %, við –10°C, inniheldur loftið aðeins um 1,5-2.5 g/m³ af vatni. Þegar þetta loft kemur inn og er hitað í 20–22 °C lækkar hlutfallsrakinn verulega, jafnvel niður í 10–15% RH en rakamagnið er það sama og utandyra eða um 2 g/m³. Þetta er einföld byggingareðlisfræði sem íslenskar byggingar og við þurfum að lifa með. Það sem skiptir máli er að hlutfallsraki segir ekki til um magn vatns í lofti, heldur hversu nálægt loftið er mettun við ákveðið hitastig. Rannsóknir benda til að rakamagn (absolute humidity) sé í raun betri mælikvarði á heilsu og veirusmit en hlutfallsraki (6,8,9). Þegar loftið er þurrara geta slímhúðir í augum, nefi og öndunarvegi orðið viðkvæmari. Margir finna þá fyrir þurrum augum, ertingu í nefi eða hálsi. Rannsóknir benda jafnframt til þess að sumar öndunarfæraveirur geti lifað lengur og dreifst auðveldara í þurru lofti, þó að smittíðni ráðist einnig af loftskiptum, mannmergð og viðverutíma í sama rými8. Spurningin er því ekki aðeins hvort loftið sé of þurrt heldur hvort rakaígjöf sé rétta svarið. Þægilegt rakahlutfall fyrir fólk getur reynst óþolandi fyrir sumar byggingar á veturna Algengt viðbragð er að óska eftir rakaígjöf til að ná 40–60% hlutfallsraka innandyra. Þó að sumar rannsóknir sýni að aukinn raki geti dregið úr einkennum í sumum tilvikum, er sambandið flókið og niðurstöður ekki samhljóða um árangur (6). Við íslenskar aðstæður þarf að bæta inn gríðarlegu magni vatns til að sjá mælanlega hækkun, sérstaklega í loftræstum húsum. Það eykur rakaálag á byggingu og getur valdið rakaþéttingu í útveggjum sem eru einangraðir að innan eins og flest steinsteypt hús á Íslandi eru, einnigí þakrýmum, og þar með aukið líkur á rakaskemmdum. Timburhús eru einnig afar viðkvæm fyrir þessu rakaálagi sérstaklega þau sem eru með illa frágengnu rakavarnarlagi, þunnum loftrásum eða of þéttu ytra byrði. Rakaskemmdir fela í sér örverur, myglu, geislabakteríur og aukna útgufun efna og tengjast aukinni áhættu á heilsufarskvillum (10). Þetta getur verið meiri heilsuvá en upprunalegi vandinn. Þetta er sérstaklega varhugavert í eldra húsnæði hérlendis þar sem útveggir eru oftast einangraðir að innan, timburþök eru algeng, rakavarnarlög ekki fullnægjandi og jafnvel ekki til staðar. Í nýrri byggingum þar sem einangrun er sett utan á burðarvirki eða steypu og kuldabrýr þannig takmarkaðar, veggir og fletir verða hlýrri, eru minni líkur á rakaþéttingu. Gluggar skipta einnig miklu máli og þrefalt gler einangrar betur en tvöfalt. Einnig skiptir máli hvernig glugginn er byggður upp við jaðra glersins og í köntum gluggans. Ef þar eru notuð efni sem leiða síður kulda, til dæmis plast eða önnur sambærileg efni í stað áls, minnkar hættan á köldum flötum, móðu og rakaútfellingu Sumir huga að því að bæta rakaígjöf í loftræsikerfi til að hækka hlutfallsraka. Rannsóknir benda til að í þeim tilfellum geti fundist skaðlegar örverur, sérstaklega ef umhirða og viðhald er ekki fullnægjandi, og þörf er á strangri eftirfylgni með sýnatökum (11,12). Því er ekkert einfalt við að auka raka „upp í 40-60% hlutfallsraka" inni í íslenskum byggingum. Oft þýðir það einfaldlega að flytja vandann – ekki leysa hann. Í stuttu máli má segja að hlutfallsrakastig sem er talið þægilegt geti verið of mikið rakaálag fyrir sumar byggingar yfir kalda vetrarmánuði á Íslandi. Við viljum hafa hlýtt og þægilegt inni, en byggingar í köldu eða tempruðu og jafnframt sveiflukenndu loftslagi geta brugðist illa við auknu rakaálagi. Þetta misræmi milli þæginda fólks og rakaþols bygginga er ein af áskorunum í innivist og hönnun bygginga á Íslandi. Aðrir þættir sem skipta máli – og við ráðum betur við en raka á veturna Upplifun sem kennd er við þurrt loft eða athugasemdir við loftgæði geta líka stafað af lélegri loftræsingu, svifryki og örfínum ögnum, rokgjörnum efnum (VOC), rakaskemmdum og útgufun byggingarefna. Eitt dæmi sem fær oft of litla athygli í þessu samhengi eru gólfteppi. Þau eru í auknum mæli valin í skrifstofurými, oft með hljóðvist að leiðarljósi. Það er skiljanleg ástæða, teppi deyfa hljóð og draga úr endurvarpi. En hljóðvist er hægt að leysa með öðrum hætti án þess að þekja gólffleti með teppum. Gólfteppi – hljóðvist á kostnað loftgæða? Gólfteppi losa rokgjörn efni, safna ryki, ofnæmisvökum og örverum og við umgengni þyrlast agnir upp í loftið þannig að svifagnir í lofti hækka verulega miðað við hörð gólfefni (13, 14,15). Norsk yfirlitsrannsókn fann engar ritrýndar heimildir sem sýna að gólfteppi styðji við gott inniloft og niðurstaðan var skýr: æskilegt er að fara varlega með notkun gólfteppa í skrifstofum, skólum og leikskólum (13). Þetta er loftgæðavandamál sem fær of litla athygli þegar efnisval er ákveðið. Hvað getum við gert? Í stað þess að reyna að framkalla raka sem hentar meginlandsloftslagi er skynsamlegra að vinna með þá þætti sem við ráðum raunverulega við: • tryggt góð loftskipti og loftræsingu • minnkað ryk og agnir • vandað efnisval (málning, innréttingar, húsmunir) o forðast efni sem losa rokgjörn efni (VOC) • notað mild þrifaefni og hreinlætisvörur án ilmefna/ertandi efna • komið í veg fyrir rakaskemmdir og unnið markvisst með rakaöryggi Þetta eru þættir sem við ráðum við og hafa raunveruleg áhrif bæði á heilsu og bygginguna sjálfa. Líðan fólks í byggingum þarf alltaf að taka alvarlega og þurrkur í slímhúðum getur verið óþægilegur. Áður en gripið er til rakaígjafar í heilu rými eða byggingu, sem getur aukið rakaálag og valdið rakaskemmdum, er skynsamlegra að styðja slímhúðir með einstaklingsbundnum aðgerðum sem bæta líðan án þess að auka rakaálag á bygginguna. Hönnum til framtíðar – í takt við íslenskt loftslag Þegar við hönnum eða endurbætum vinnustaði og heimili þurfa hönnuðir, verkfræðingar og rekstraraðilar að vinna út frá heilnæmi bygginga, íslensku loftslagi og byggingareðlisfræði. Góð innivist snýst um jafnvægi á milli fagsviða (hljóðs, lýsingar, loftgæða og varma) og heilsu notenda, endingu bygginga, orkunotkun og rekstrar. Þurrt loft veldur oft óþægindum og það er eðlilegt að fólk óski eftir betri líðan. En í íslensku veðurfari, þar sem rakaskemmdir eru algengar og húsnæði er viðkvæmt fyrir rakaálagi, verðum við að vanda okkur. Viðvera, vellíðan og frammistaða á vinnustöðum ræðst ekki aðeins af menningu, félagslegu umhverfi og stjórnun heldur líka af byggingunum sjálfum, loftgæðum, ástandi þeirra og innivist. Böðvar Bjarnason Byggingatæknifræðingur og húsasmíðameistari VERKVIST Sylgja Dögg Sigurjónsdóttir Líffræðingur og Lýðheilsufræðingur VERKVIST Heimildir 1. Allen JG, MacNaughton P, Satish U, Santanam S, Vallarino J, Spengler JD. Associations of Cognitive Function Scores with Carbon Dioxide, Ventilation, and Volatile Organic Compound Exposures in Office Workers: A Controlled Exposure Study of Green and Conventional Office Environments. Environ Health Perspect. 2016;124(6):805-812. doi:10.1289/ehp.1510037 2. Laurent JGC, MacNaughton P, Jones E, et al. Associations between Acute Exposures to PM2.5 and Carbon Dioxide Indoors and Cognitive Function in Office Workers: A Multicountry Longitudinal Prospective Observational Study. Environ Res Lett ERL Web Site. 2021;16(9):094047. doi:10.1088/1748-9326/ac1bd8 3. Wargocki P, Wyon D. Ten questions concerning thermal and indoor air quality effects on the performance of office work and schoolwork. Build Environ. 2016;112. doi:10.1016/j.buildenv.2016.11.020 4. Voordt T van der, Jensen PA. The impact of healthy workplaces on employee satisfaction, productivity and costs. J Corp Real Estate. 2021;25(1):29-49. doi:10.1108/JCRE-03-2021-0012 5. Strömberg C, Aboagye E, Hagberg J, Bergström G, Lohela-Karlsson M. Estimating the Effect and Economic Impact of Absenteeism, Presenteeism, and Work Environment-Related Problems on Reductions in Productivity from a Managerial Perspective. Value Health J Int Soc Pharmacoeconomics Outcomes Res. 2017;20(8):1058-1064. doi:10.1016/j.jval.2017.05.008 6. Wolkoff P. The mystery of dry indoor air – An overview. Environ Int. 2018;121:1058-1065. doi:10.1016/j.envint.2018.10.053 7. Bux K. Einfluss niedriger Luftfeuchten auf den Menschen im Kontext der Arbeitswelt. Published online 2024. doi:10.21934/BAUA:FOKUS20241028 8. Shaman J, Kohn M. Absolute humidity modulates influenza survival, transmission, and seasonality. Proc Natl Acad Sci U S A. 2009;106(9):3243-3248. doi:10.1073/pnas.0806852106 9. Wolkoff P. External eye symptoms in indoor environments. Indoor Air. 2017;27(2):246-260. doi:10.1111/ina.12322 10. World Health Organization. WHO Guidelines for Indoor Air Quality: Dampness and Mould. WHO; 2009. https://apps.who.int/iris/handle/10665/164348 11. Mendell MJ, Cozen M, Lei-Gomez Q, et al. Indicators of moisture and ventilation system contamination in U.S. office buildings as risk factors for respiratory and mucous membrane symptoms: analyses of the EPA BASE data. J Occup Environ Hyg. 2006;3(5):225-233. doi:10.1080/15459620600628589 12. Mendell MJ, Lei-Gomez Q, Mirer AG, Seppänen O, Brunner G. Risk factors in heating, ventilating, and air-conditioning systems for occupant symptoms in US office buildings: the US EPA BASE study. Indoor Air. 2008;18(4):301-316. doi:10.1111/j.1600-0668.2008.00531.x 13. Becher R, Øvrevik J, Schwarze PE, Nilsen S, Hongslo JK, Bakke JV. Do Carpets Impair Indoor Air Quality and Cause Adverse Health Outcomes: A Review. Int J Environ Res Public Health. 2018;15(2):184. doi:10.3390/ijerph15020184 14. Noorian Najafabadi SA, Sugano S, Bluyssen PM. Impact of Carpets on Indoor Air Quality. Appl Sci. 2022;12(24):12989. doi:10.3390/app122412989 15. Ren J, Wade M, Corsi RL, Novoselac A. Particulate matter in mechanically ventilated high school classrooms. Build Environ. 2020;184:106986. doi:10.1016/j.buildenv.2020.106986

Dr. Ásta Logadóttir hefur gengið til liðs við VERKVIST sem fagstjóri ljósvistar. Með komu hennar styrkist ráðgjöf fyrirtækisins um dagsbirtu, raflýsingu og gæði bygginga fyrir fólkið sem notar þær. Ásta mun jafnframt taka þátt í að móta áfram svið innivistar og lýðheilsu ásamt Sylgju Dögg Sigurjónsdóttur. Ásta er rafmagnsverkfræðingur með doktorspróf í byggingarverkfræði frá Álaborgarháskóla. Hún hefur áralanga reynslu af rannsóknum og ráðgjöf á sviði ljósvistar og innivistar. Hún hefur meðal annars komið að þróun krafna og leiðbeininga um ljósvist í íslenskri byggingarreglugerð. Betri ákvarðanir um birtu og lýsingu Sérþekking Ástu nýtist við nýbyggingar, endurbætur og mat á aðstæðum í húsnæði sem þegar er í notkun. Hún veitir meðal annars lýsingarráðgjöf, annast útreikninga, mælingar og greiningar og ráðleggur um sólarljós og skuggavarp í skipulagi. Með því að skoða birtuskilyrði snemma í hönnunarferlinu geta verkkaupar og hönnunarteymi tekið betur upplýstar ákvarðanir um glugga, rýmisskipulag, form bygginga og lýsingu. Í núverandi húsnæði getur slík greining hjálpað til við að finna hvað má bæta og forgangsraða úrbótum. Byggingar eru fyrir fólk VERKVIST verkfræðistofa er sérhæfð í ráðgjöf og greiningum varðandi innivist og sjálfbærni bygginga. Við höfum lengi unnið með áhrif bygginga á heilsu og líðan, meðal annars út frá loftgæðum, raka, efnisvali og byggingareðlisfræði. Með komu Ástu tengjum við þá þekkingu enn betur við dagsbirtu og raflýsingu. Við viljum vinna með verkkaupum, húsbyggjendum og hönnunarteymum sem hafa metnað fyrir byggingunum sínum og horfa á gæði þeirra sem eina heild. Við komum með sérþekkinguna sem þarf til að greina aðstæður, meta valkosti og finna raunhæfar lausnir. Þar er innivist höfð að leiðarljósi og skoðuð í samhengi við byggingareðlisfræði, efnisval, endinguna, orkunotkun og umhverfisáhrif — frá hönnun til framkvæmda og reksturs. Við bjóðum Ástu hjartanlega velkomna, ljósberann okkar og nýjan liðsfélaga í þverfaglegum sérfræðingahópi VERKVISTAR. Hér má finna frekari upplýsingar um Ástu Logadóttir hafið samband í tölvupósti asta@verkvist.is

Björg Bjarnadóttir til liðs við VERKVIST sem fagleiðtogi umhverfisvottunar VERKVIST hefur ráðið Björgu Bjarnadóttur til starfa sem fagleiðtoga umhverfisvottunar. Björg kemur til fyrirtækisins með sterkan fræðilegan grunn og alþjóðlega reynslu á sviði sjálfbærrar mannvirkjagerðar, loftslagsmála og sjálfbærniráðgjafar. Hún er með B.Sc. í umhverfis - og byggingarverkfræði frá Háskóla Íslands og meistaragráðu í Engineering for Sustainable Development frá University of Cambridge. Undanfarin ár starfaði Björg hjá ráðgjafarfyrirtækinu 3Keel í Oxford þar sem hún ráðlagði alþjóðlegum fyrirtækjum um kolefnisspor, loftslagsstefnu og sjálfbærni. Áður starfaði hún hjá VSÓ Ráðgjöf og kom þar meðal annars að BREEAM-vottunum, sjálfbærniverkefnum og þróun lausna sem styðja við hringrásarhagkerfið í íslenskum byggingariðnaði. Hjá VERKVIST mun Björg leiða áfram uppbyggingu umhverfisvottana og efla ráðgjöf fyrirtækisins á sviði sjálfbærni. Ráðning hennar styður við framtíðarsýn fyrirtækisins um að samþætta byggingatækni, innivist og sjálfbærni þannig að mannvirki séu hönnuð með langtímaverðmæti í huga, fyrir fólkið sem notar þau og umhverfið sem þau verða hluti af. „Loftslagsáhætta er ofar í huga Breta“ Aðspurð um hvað hafi dregið hana til VERKVISTAR segir Björg skýra áherslu fyrirtækisins á heilsu, vellíðan og sjálfbærni hafa heillað hana, auk þess sem spennandi sé að taka þátt í uppbyggingu ungs og metnaðarfulls fyrirtækis. Björg segir einn helsta muninn á stefnu sjálfbærnimála á Íslandi og Bretlandi vera að þar sé meiri áhersla lögð á loftslagsáhættu - áhrif loftslagsbreytinga á fyrirtæki og samfélag. Til dæmis eru loftslagsbreytingar nú þegar farnar að hafa raunveruleg áhrif á timburframleiðslu, uppskeru matvæla og fleira, og þar með neikvæð fjárhagsleg áhrif á fyrirtæki. Þessi fyrirtæki hafa því haft aukinn áhuga á því að greina sína loftslagsáhættu og fara í aðgerðir til að lámarka hana. Endurnotkun byggingarefna lykilatriði Sjálfbærni snýst að mati Bjargar um að byggja upp, þróa og viðhalda kerfum sem mæta þörfum nútímans án þess að skerða lífsgæði komandi kynslóða en það er ekki hægt á þess að taka umhverfi okkar inn í myndina. Hún segir að mikilvægt sé að minna sig á þetta stærra samhengi.Ef hún gæti haft áhrif á eina breytingu í íslenskum byggingariðnaði á næstu tíu árum væri það aukin endurnotkun byggingarefna. Samkvæmt nýjustu tölum HMS megi rekja nær helming kolefnisspors nýbygginga til framleiðslu byggingarefna og um 10% til niðurrifs. Með aukinni endurnotkun mætti draga úr losun á báðum stöðum og um leið skapa einstök verkefni með sérstöðu og sögu úr nærumhverfinu. Mikilvæg viðbót við teymið „Við erum afar þakklát fyrir að fá Björgu til liðs við VERKVIST. Hún kemur með einstaka blöndu af sterkum fræðilegum grunni, alþjóðlegri reynslu og metnaði til að hafa raunveruleg áhrif. Sýn hennar á sjálfbærni fellur einstaklega vel að þeirri stefnu sem við höfum markað fyrirtækinu,“ segir Alma Dagbjört Ívarsdóttir, framkvæmdastjóri VERKVISTAR. „Við viljum ekki aðeins hjálpa viðskiptavinum okkar að uppfylla kröfur um umhverfisvottanir heldur styðja við þróun heilnæmra og endingargóðra mannvirkja sem skapa verðmæti til langs tíma. Þar mun Björg gegna lykilhlutverki".

Er þetta samþykkt? Algeng spurning í umhverfisvottuðum byggingarverkefnum. Í umhverfisvottuðum byggingarverkefnum kemur ein spurning upp aftur og aftur: Er þetta samþykkt eða vottað? Hún getur átt við fjöldann allan af byggingarvörum og efnum m.a. um lím, einangrun, klæðningar, gólfefni, málningu eða jafnvel heimilistæki.  Spurningin snýst um það hvort varan uppfylli kröfur vottunarkerfa eins og BREEAM og Svansvottunar, og hvort hægt sé að sýna fram á það með viðeigandi gögnum.  Sjá grein í Viðskiptablaðinu Er þetta samþykkt? Það sem skiptir máli Þegar yfirsýn vantar getur svona fyrirspurn orðið bæði tímafrek og kostnaðarsöm. Upplýsingar eru oft til staðar, en þær eru ekki endilega aðgengilegar þegar á reynir. Gögn geta legið í ólíkum skjölum, hjá framleiðanda, í eldri verkefnum eða dreifð á milli aðila.  Í umhverfisvottuðum verkefnum skiptir máli að vita hvernig vörur tengjast viðmiðum vottunarkerfa og hvaða gögn þarf að leggja fram í hverju tilviki til að uppfylla kröfur. Það getur verið mismunandi eftir kerfum, útgáfum þeirra og eðli verkefna. Þegar slíkt er ekki skilgreint fyrirfram þarf gjarnan að fara yfir sömu vörur og sömu skjöl ítrekað.  Kröfurnar eru ekki þær sömu milli kerfa.   Í BREEAM er til dæmis hægt að fá stig fyrir byggingarefni með lága losun rokgjarnra lífrænna efna (VOC) en þá þarf að leggja fram viðurkenndar prófanir eða sambærileg gögn til að sýna fram á lága losun. Svansvottun setur aftur á móti víðtækari kröfur um efnainnihald og bann við tilteknum hættulegum efnum í byggingavörum. Í Svansvottuðum verkefnum þurfa margar vörur jafnframt að vera skráðar í vörugátt Svansins sem heitir Supply Chain Declaration Portal (SCDP). Sama vara getur því krafist mismunandi gagna eftir því hvaða vottunarkerfi er unnið eftir.  Yfirsýn yfir vörur og upplýsingar Í mörgum fyrirtækjum falla þessar fyrirspurnir utan hefðbundinna hlutverka. Þær lenda gjarnan hjá sölumönnum, vörustjórum eða tæknifólki sem sinna þeim samhliða öðrum verkefnum. Afleiðingin getur verið sú að sama vinna endurtekur sig, svör verða ekki alltaf samræmd og mikil orka fer í að finna upplýsingar sem ættu að vera tiltækar.  Þess vegna verður sífellt mikilvægara að fyrirtæki kortleggi vörur sínar með tilliti til vottunarkerfa og haldi utan um þau gögn sem tengjast hverri vöru. Þegar slík yfirsýn er til staðar verður auðveldara að svara fyrirspurnum, miðla upplýsingum á samræmdan hátt og draga úr óþarfa endurtekningu í vinnu.  Umhverfisvottanir eru í dag orðnar fastur hluti af byggingamarkaðinum. Af þessari reynslu höfum við hjá VERKVIST mótað ákveðna nálgun í okkar vinnu. Í stað þess að bregðast við hverri fyrirspurn fyrir sig höfum við í auknum mæli komið inn í fyrirtæki og aðstoðað við að skapa yfirsýn yfir vörur og gögn í tengslum við umhverfisvottanir. Sú vinna felst meðal annars í að kortleggja vörur söluaðila og birgja gagnvart mismunandi vottunarkerfum og halda utan um þau gögn sem tengjast hverri vöru.   Þessa nálgun höfum við meðal annars nýtt í samstarfi við Límtré Vírnet, þar sem unnið hefur verið að kortlagningu vara og gagna með tilliti til umhverfisvottana og uppsetningu á skýrara verklagi í tengslum við fyrirspurnir.  Umhverfissérfræðingur til stuðnings Úr þessu hefur þjónustan Umhverfissérfræðingur til stuðnings þróast. Hún byggir á því að við komum inn sem faglegt bakland og aðstoðum fyrirtæki við að halda utan um  gögn og verklag tengt umhverfisvottunum. Markmiðið er ekki að taka yfir verkefni, heldur að styðja söluteymi og aðra starfsmenn í daglegum fyrirspurnum og samskiptum við hönnuði, verkkaupa og verktaka.  Þannig verður til gagnasafn og sameiginleg yfirsýn sem nýtist aftur og aftur. Þegar fyrirspurnir berast er hægt að byggja á upplýsingum sem þegar liggja fyrir, í stað þess að hefja leitina upp á nýtt í hvert skipti. Þetta einfaldar svörun, stuðlar að samræmdri upplýsingagjöf og dregur úr álagi á innri teymi.  Umhverfisvottanir eru í dag orðnar fastur hluti af byggingamarkaðinum. Fyrirtæki sem halda utan um upplýsingar á markvissan hátt eiga auðveldara með að mæta kröfum þeirra. Í sumum tilvikum getur verið gagnlegt að fá stuðning við að greina samræmi vara við kröfur vottunarkerfa og setja þær fram á skýran og sannreynanlegan hátt. Slík vinna styrkir samkeppnisstöðu, dregur úr óvissu í söluferlinu og eykur trúverðugleika gagnvart verkkaupum og ráðgjöfum.     Hulda Einarsdóttir  Fagleiðtogi Umhverfisvottana hjá VERKVIST  Doktorsnemi í Umhverfisfræði

Sérfræðingur til leigu Umhverfissérfræðingur til leigu er sérfræðingur í teyminu sem styður söluteymi og tryggir faglega upplýsingagjöf gagnvart markaðnum. ​ Umhverfisvottanir bygginga eru orðnar lykilþáttur í flestum stærri byggingarverkefnum. Til að uppfylla kröfur vottunarkerfa á borð við BREEAM og Svansvottun þurfa byggingaraðilar að leggja fram rétt, samræmd og áreiðanleg gögn um þær byggingarvörur sem notaðar eru í verkefnum. Slík gögn koma að stórum hluta frá framleiðendum, innflytjendum og söluaðilum byggingarvara. ​ Í þessu samhengi gegna þeir aðilar sem selja og miðla byggingarvörum lykilhlutverki. Þeir þurfa að geta svarað skýrt og faglega:  hvernig vörur uppfylla viðmið vottunarkerfa hvaða forsendur liggja að baki mati hvaða gögn styðja slíkar fullyrðingar​  Umhverfisvottunarkerfi bygginga gera auknar kröfur til upplýsinga um hvernig byggingarvörur falla að viðmiðum og hvaða gögnum þarf að skila inn.   Ósamræmdar eða ófullnægjandi upplýsingar geta haft áhrif á samskipti við viðskiptavini, framgang verkefna og þátttöku í útboðum. ​ Með Umhverfissérfræðingi til leigu fá fyrirtæki aðgang að sérhæfðri umhverfisþekkingu sem starfar sem hluti af teyminu, án þess að uppfylla heilt stöðugildi.   Þjónustan er faglegt bakland fyrir sölu- og markaðsteymi og styður fyrirtæki í samskiptum við hönnuði, verkkaupa og byggingaraðila með samræmdri og áreiðanlegri upplýsingagjöf. Sjá nánari upplýsingar á Sérfræðingur til leigu | VERKVIST

Það er okkur hjá VERKVIST sönn ánægja að kynna Jón Pálsson sem nýjan leiðtoga verkefnastjórnunar, en hann hóf störf hjá fyrirtækinu í september. Jón er véla- og rekstrarverkfræðingur með M.Sc . frá Aalborg University og Executive Blue MBA frá Copenhagen Business School. Hann hefur víðtæka reynslu af verkefnastjórnun, rekstri, nýsköpun og byggingarframkvæmdum – bæði sem stofnandi, framkvæmdastjóri og ráðgjafi. Jón hefur einnig byggingarstjóraréttindi frá Húsnæðis- og mannvirkjastofnun (HMS). Frétt um Jón birtist á síðu Viðskiptablaðsins í dag (22. des 25) Byggði upp saltvinnslu með jarðhita – byggir nú upp svið verkefnastjórnunar hjá VERKVIST Margir þekkja Jón sem meðeiganda Björns Steinars, sonar síns, að Saltverki ehf., frumkvöðlafyrirtækis sem hefur vakið athygli fyrir framleiðslu á íslensku sjávarsalti með notkun jarðhita á Reykjanesi við Ísafjarðardjúp. Hjá Saltverki leiddi Jón uppbyggingu tæknikerfa og framleiðslulínu, ásamt verkefna- og rekstrartengdum lausnum.  Björn hefur nú keypt hlut Jóns í félaginu eftir 13 ára farsælt samstarf þeirra feðga. Fyrir stofnun Saltverks hafði Jón átt í rekstri verktakafyrirtækisins Ans ehf., Verkfræðistofunnar Hafnar og öðrum félögum tengdum fasteignaþróun. Hann fór fyrir fyrirtækjunum Tetra Íslandi, Højgaard & Schultz á Íslandi og Ármannsfelli ásamt því að vera þróunarstjóri Samskipa um fimm ára skeið. Jón Pálsson er véla- og rekstrarverkfræðingur með M.Sc . og MBA gráðu Hjá VERKVIST hefur Jón þegar hafist handa við innleiðingu á nýju gæða- og verkefnastjórnunarkerfi hjá VERKVIST sem er einnig um þessar mundir í ISO 9001 vottunarferli til að bæta ferla og gæði þjónustunnar til viðskiptavina. „Með komu Jóns verður okkur kleift að fylgja verkefnum enn markvissar eftir. Ætlunin er að efla verkferla og breikka svið verkefna og ráðgjafar í takt við vaxandi eftirspurn viðskiptavina eftir heildrænni þjónustu. Reynsla Jóns spannar allt frá frumkvöðlastarfi og hönnunar til framkvæmda og rekstrar – afar sjaldgæf blanda sem nýtist vel í fjölbreyttum verkefnum VERKVISTAR“, segir Sylgja Dögg Sigurjónsdóttir, framkvæmdastjóri VERKVISTAR. Unnu fyrst saman að frumkvöðla- og þróunarverkefni um stofnun heilsuklasa  Leiðir Jóns og Sylgju lágu fyrst saman árið 2012 þegar þau unnu að frumkvöðlaverkefni við stofnun heilsuklasa sem síðar sá um verkefnastjórnun m.a. á Heilsueflandi samfélagi í Mosfellsbæ. Um var að ræða   þróunarverkefni þar sem Mosfellsbær, í samstarfi við Embætti Landlæknis, tók forystuna sem sveitarfélag við að styðja íbúa sína í átt að betri lífstíl og heilsu. Markmiðið var að auka heilsuvitund og sporna við frekari hættu á lífsstílssjúkdómum. Verkefnið endurspeglaði sameiginlega sýn Jóns og Sylgju sem hefur ekki breyst öll þessi ár  – umhyggju fyrir umhverfinu og lýðheilsu. Þau hafa bæði sótt í að sinna verkefnum á þeim nótum alla tíð.  Jón Pálsson, leiðtogi verkefnastýringar og Sylgja Dögg Sigurjónsdóttir, framkvæmdastjóri VERKVISTAR Þegar Jón fór að hugsa sér til hreyfings úr saltvinnslunni varð VERKVIST honum efst í huga. Hann hafði fylgst með fyrirtækinu vaxa og dafna í þá átt sem hann sá fyrir sér að verða hluti af og hafa frekari áhrif á með sinni reynslu og þekkingu. Hann er sammála sýn VERKVISTAR á að byggingar eigi að vera fyrir fólk og því þarf að huga að mörgu þegar kemur að gæðum og verkferlum. Umhyggja, fagmennska og framsækni VERKVIST er ung verkfræðistofa en stofnendur sem eru reynsluboltar úr iðnaðinum hafa byggt fyrirtækið upp með jöfnu kynjahlutfalli og fjölbreyttum aldurshópi. Lögð er áhersla á að sýna fólki og umhverfinu umhyggju og virðingu og skapa vinnuumhverfi þar sem starfsmenn læri hver af öðrum og hafi rödd. Áhersla er lögð á að lágmarka vistspor og að byggingar eigi að vera fyrir fólk - í raun að húsin séu mönnum og dýrum hæf. Velkomin Jón til starfa Teymið hjá VERKVIST

Við hjá VERKVIST erum stolt af því að hafa tekið virkan þátt í alþjóðlegu ráðstefnunni Healthy Buildings 2025 Europe , sem fram fór 7.–11. júní 2025 í Hörpu og Háskólanum í Reykjavík. Nær 400 þátttakendur frá 40 löndum tóku þátt í faglegu samtali um heilnæma og sjálfbæra byggð. Einn af eigendum VERKVISTAR, Sylgja Dögg Sigurjónsdóttir, var ráðstefnustjóri og leiddi undirbúning og framkvæmd. Öll starfssemi okkar lagði sitt af mörkum – með þekkingu, skipulagi og eldmóði – samhliða daglegum verkefnum. Vincent E. Merida sérfræðingur VERKVISTAR sat í vísindanefndinni ásamt Ólafi H. Wallevik prófessor í Háskólanum í Reykjavík og fleiri aðilum. Að taka þátt í að halda ráðstefnuna var ekki aðeins heiður heldur skýr birtingarmynd af metnaði okkar hjá VERKVIST: við viljum byggja brú milli rannsókna og raunveruleika, og stuðla að því að ákvarðanir um byggingar og manngert umhverfi byggist á bestu þekkingu sem völ er á hverju sinni. Okkar sýn er að heilnæm innivist, loftgæði og vistvæn hönnun sem styður heilsu eigi að vera grunnstoðir í allri þróun bygginga til framtíðar. Ráðstefnan er á vegum ISIAQ og eingöngu flutt þar erindi sem standast ritrýni og faglegar kröfur. Fjallað var m.a. um loftslagsbreytingar, dagsbirtu, hljóðvist, varmavist, raka og loftgæði – og hvernig þessi atriði tengjast heilsu og líðan. IceIAQ íslandsdeild ISIAQ , sem Sylgja Dögg, Heiða Mjöll og Alma Dagbjört sitja í stjórn fyrir, stóð að umsókn Íslands um að halda ráðstefnuna – sem setti Ísland á kortið í alþjóðlegri umræðu um innivist og sjálfbærni. Þakkir Við þökkum öllum þeim sem lögðu hönd á plóg og styrktu viðburðinn – sérstaklega starfsfólki og nemendum Háskólans í Reykjavík, tækniaðstoðarteyminu, tímavörðum, vísindanefndinni, samstarfsfólki frá Lotu verkfræðistofu, Umhverfisstofnun (UOS), Húsnæðis- og mannvirkjastofnun (HMS), Grænni byggð, ISIAQ samfélaginu, og öðrum styrktaraðilum. Við höfum þá trú að faglegt samtal og miðlun þekkingar hafi áhrif á framtíð hins byggða umhverfis hérlendis og erlendis. Byggjum til framtíðar með innivist, sjálfbærni og gæði að leiðarljósi Í framhaldi af alþjóðlegu ráðstefnunni var íslenskt málþing með samantekt af ráðstefnu og faglegum erindum um hvernig við byggjum til framtíðar á Íslandi með innivist, sjálfbærni endingu og gæði í forgrunni. Hér má nálgast íslenska málþingið.

VERKVIST hefur unnið að gerð EPD blaða fyrir yleiningar og límtrésbita Límtré Vírnets – mikilvægur áfangi fyrir sjálfbæra mannvirkjagerð á Íslandi. Í ljósi væntanlegra breytinga á byggingareglugerð þar sem krafist verður lífsferilsgreininga (LCA greining) fyrir byggingar hefur VERKVIST unnið náið með Límtré Vírnet að þróun umhverfisyfirlýsinga (EPD – Environmental Product Declaration) fyrir tvær af lykilvörum fyrirtækisins: Yleiningar og Límtrésbita (GLT). VERKVIST heimsækir Límtré Vírnet Hvað er EPD blað? Umhverfisyfirlýsing vöru (EPD blað) segir til um kolefnisspor vörunnar sem og önnur umhverfisáhrif og er lykilþáttur til að auðvelda gerð lífsferilsgreininga bygginga. Umhverfisyfirlýsing vöru (EPD) er staðlað skjal, staðfest af óháðum þriðja aðila, sem gefur upp umhverfisáhrif vöru yfir allan lífsferil hennar. EPD gegnir lykilhlutverki við lífsferilsgreiningu bygginga og samanburð á umhverfisáhrifum byggingarefna. Skjölin hafa verið sannreynd af óháðum þriðja aðila og eru aðgengileg á vef EPD Norway. Auk þess verða þau fljótlega fáanleg í helstu gagnagrunnum sem tengjast lífsferilsgreiningum fyrir byggingar, eins og t.d. One Click LCA, sem mun auðvelda gerð LCA greininga fyrir íslensk mannvirki. EPD blað Breytingar 1.se ptember 2025 “Frá og með 1. september 2025 verður skylt að skila inn lífsferilsgreiningu bæði við umsókn um byggingarleyfi og við lokaúttekt fyrir byggingar í umfangsflokki 2 og 3.” -HMS Heildstæð greining á vöruframboði VERKVIST vann einnig heildstæða greiningu á vöruframboði Límtré Vírnets með það að markmiði að uppfylla kröfur helstu umhverfisvottunarkerfa – þar á meðal BREEAM og Svansvottunar. Lögð var áhersla á lykilvörur og farið yfir upprunavottorð, efnisinnihald og skráningu í viðurkennda efnisgrunna Svansins (SDCP). Niðurstöðurnar leiddu af sér skýrar og hagnýtar aðgerðir sem einfalda innleiðingu varanna í vottaðar framkvæmdir og styrkja samkeppnisstöðu þeirra á sviði sjálfbærrar mannvirkjagerðar. Með því er Límtré enn betur í stakk búið til að mæta kröfum um sjálfbæra mannvirkjagerð og taka þátt í verkefnum sem stefna að umhverfisvottunum. Framtíðarsýn og áframhaldandi þróun Með gerð EPD blaða fyrir sínar lykilvörur gerir Límtré Vírnet hagsmunaaðilum kleift að taka upplýstar ákvarðanir og undirstrikar jafnframt skýra og markvissa framtíðarsýn fyrirtækisins í umhverfismálum. Við hjá VERKVIST erum stolt af samstarfinu og höldum ótrauð áfram í samvinnu við Límtré Vírnet að gerð fleiri EPD blaða – meðal annars fyrir ál- og stálklæðningar þeirra. Grein Límtré Vírnets: Í haust breytast leikreglur á byggingamarkaði. Límtré Vírnet er tilbúið. - Límtré Vírnet Vantar þig EPD blað fyrir vöruna þína? Við höfum þekkinguna og reynsluna sem þarf til í allt ferlið. Hafðu samband við VERKVIST og fáðu ráðgjöf Alma Dagbjört Ívarsdóttir alma@verkvist.is Vincent Elijiah Merida vincent@verkvist.is

Sylgja Dögg frá VERKVIST tók þátt í fundi á vegum HMS – Húsnæðis- og mannvirkjastofnunar – undir yfirskriftinni Tími til kominn að bregðast við . Þar kom saman fagfólk, stjórnvöld og hagaðilar í byggingargeira num og fjallað um þann mikla vanda sem blasir við vegna byggingargalla hér á landi og kynntur nýr Vegvísir HMS um breytt byggingareftirlit. Frá málþingi HMS - Tími til að bregðast við Þurfum breytingar á núverandi kerfi Vegvísir HMS leggur til: áhættumiðað ytra eftirliti óháðra skoðunarstofa afnám byggingarstjórakerfis lögbundna byggingargallatryggingu í framhaldi Markmiðið er að auka skilvirkni, draga úr kostnaði til lengri tíma og tryggja skýrari ábyrgð fagaðila – en um leið að efla neytendavernd og fagmennsku í byggingariðnaði og umbuna þeim sem gera vel. Við hjá VERKVIST fögnum því að áform um skref til að bæta gæði mannvirkja á Íslandi séu í farvatninu. BETRA EFTIRLIT – SKÝR ÁBYRGÐ – FAGMENNSKA Í FYRIRRÚMI Með vegvísinum að breyttu byggingareftirliti er lagður grunnur að kerfisbreytingum sem geta haft áhrif – ekki aðeins á neytendavernd heldur einnig á starfsumhverfi hönnuða, iðnmeistara og framkvæmdaaðila. Næst á dagskrá er útfærsla  Nú tekur við mikilvægt tímabil þar sem verkefnið er að móta nýtt eftirlitskerfi með aðkomu hagðaðila. Ávinningur fyrir fagfólk og framtíðina Það að starfa í umhverfi þar sem ábyrgð er skýr og eftirlit gagnsætt og faglegt, skapar betri aðstæður fyrir alla sem koma að mannvirkjagerð: Viðurkenning fyrir vönduð vinnubrögð Skýrari ábyrgð Aukið traust milli fagstétta, verkkaupa og notenda Heilbrigðara starfsumhverfi og betri markað Hér má nálgast vegvísir HMS um breytt byggingareftirlit , sem ætlað er að efla gæði og ábyrgð í framkvæmdum. Vegvísir að breyttu byggingareftirliti - HMS Framlag VERKVISTAR á málþinginu Sylgja Dögg Sigurjónsdóttir , lýðheilsu- og líffræðingur og einn af eigendum VERKVISTAR, flutti erindi um rakaskemmdir í nýlegu húsnæði  og dró fram mikilvægi þess að beina sjónum að heilnæmu byggingarumhverfi í lýðheilsulegu tilliti og ábyrgð aðila í ferlinu. Erindið fjallaði meðal annars um: Hvernig rakaskemmdir birtast og algengustu orsakir Þörfina fyrir skýra ábyrgðarkeðju og eftirfylgni Sylgja lagði áherslu á mikilvægi samstarfs og lausnamiðaðrar nálgunar til að tryggja öryggi, heilbrigði og langtíma endingu mannvirkja. Sylgja Dögg Sigurjónsdóttir, innivist & byggingar - VERKVIST Dagskrá málþingsins Opnun fundar Hermann Jónasson , forstjóri HMS Af hverju breytt byggingareftirlit? Þórunn Sigurðardóttir , framkvæmdastjóri mannvirkja- og sjálfbærnisviðs, HMS Rakaskemmdir í nýlegu húsnæði Sylgja Dögg Sigurjónsdóttir , eigandi Verkvistar   Pallborðsumræður um byggingagalla í nýbyggingum Þorgils Sigvaldason – húseigandi og reynslusaga Sigríður Ósk Bjarnadóttir – Hornsteinn Þórunn Sigurðardóttir – HMS Sigmundur Grétar Hermannsson – Fagmat Stjórnandi : Þórhallur Gunnarsson Pallborð & umræður - HMS málþing 12. maí 2025 Horfa á málþingið og lesa meira: 📺 Upptaka af málþinginu má finna á vef HMS: 👉 Tími til kominn að bregðast við – húsnæðis- og mannvirkjastofnun   📰 Fjallað var um málþingið á Vísir.is : 👉 Lesa frétt á Vísir

Í nýrri grein á Vísi fjallar Hlynur Júlíusson , hjá VERKVIST, um mikilvægi þess að endurskoða leikreglurnar í fasteignaviðskiptum. Hlynur hefur sinnt ástandsskoðunum fasteigna, heimilisskoðunum , gallagreiningum og ráðgjöf vegna endurbóta og viðhalds fasteigna um árabil en hann starfaði áður sem húsasmiður við lagfæringar á rakaskemmdum húsnæðum. Í greininni er bent á ákveðið mynstur í beiðnum sem berast um skoðanir á fasteignum en skortur á skýrum ramma og verkferlum virðist vera ábótavant. Kaupendur sitja oft eftir með sárt ennið þar sem gallar hafa komið í ljós eftir afhendingu, afsal eða jafnvel eftir að hafa orðið fyrir heilsubresti við dvöl í fasteigninni. Lesa má greinina í heild sinni á Vísi til að sjá hvað við getum gert til að breyta þessu:👉 Fasteignaviðskipti: Tímabært að endurskoða leikreglurnar Við hjá VERKVIST trúum því að með fagmennsku, samræmdu verklagi og opnu samtali sé hægt að skapa traustari og sanngjarnari markað – þar sem hagsmunir allra eru teknir alvarlega. Nánar um heimilisskoðanir Beiðni um skoðun er send á skodun@verkvist.is Hlynur Júlíusson hjá VERKVIST - innivist & byggingar

Allt frá barnæsku hefur byggingartæknifræðingurinn Ævar Kærnested, viljað kafa dýpra og vita „af hverju?“ Sú hugsun hefur nú skilað sér í raunhæfum lausnum fyrir byggingariðnaðinn en Ævar útskrifaðist sem byggingartæknifræðingur og húsasmíðameistari frá Háskóla Reykjavíkur í vor og gerði lokaverkefni um varðveitingu íslenskra útveggja. Úr verkefninu spruttu raunhæfar og framtíðarmiðaðar lausnir fyrir byggingariðnaðinn sem hafa nú þegar verið nýttar við fjölbreyttar greiningar- og þróunarverkefni hjá VERKVIST. Ævar Kærnested, byggingartæknifræðingur frá HR og húsasmíðameistari Það er okkur því hjá VERKVIST sönn ánægja að tilkynna að Ævar Kærnested  hefur nú hafið full störf hjá VERKVIST. Ævar hefur starfað hjá okkur samhliða námi síðan í maí 2024 og lagt sitt af mörkum í fjölbreyttum greiningar- og þróunarverkefnum sem tengjast byggingatækni, heilnæmri innivist, loftgæðum og umhverfismálum. Ævar sem einnig er húsasmíðameistari á að baki sjö ára reynslu í byggingariðnaði, bæði við framkvæmd, eftirlit, úttektir og ástandsgreiningar. Hann hefur skarað fram úr í námi, var dúx í menntaskóla og verkefni hans endurspegla dýpt, fagmennsku og áhuga á sviði umhverfis og bygginga.   Rótgróinn áhugi og dýpt í hugsun Áhugi Ævars á eðli hluta og hvernig þeir virka kviknaði snemma – sem barn spyrjandi stöðugt „af hverju?“. Sú þörf fyrir að skilja málin og ferla í kjölinn, fremur en að sætta sig við yfirborðssvör, hefur fylgt honum allt frá því hann byrjaði í húsasmíði og áfram inn í háskólanám í byggingartæknifræði.   Þessi forvitni og djúpa hugsun skín í gegn í lokaverkefninu hans, þar sem hann leitar ekki eingöngu svara við því  hvað  veldur skemmdum á útveggjum, heldur hvers vegna  – og hvernig við getum hannað betri lausnir með tilliti til byggingareðlisfræði og raunverulegra íslenskra aðstæðna.    „Það hefur verið ómetanlegt að vinna að fjölbreyttum verkefnum og með þverfaglegu teymi hjá VERKVIST á meðan á náminu stóð – það gaf mér bæði dýpri skilning og innsýn sem ég gat fléttað beint inn í verkefnið mitt. Ég er spenntur fyrir því að halda áfram að kafa ofan í þessi viðfangsefni og nýta þekkinguna í þágu raunverulegra lausna,“ segir Ævar.   Lokaverkefnið: Varðveiting íslenskra útveggja Í verkefninu Varðveiting íslenskra útveggja  rannsakaði Ævar byggingareðlisfræðileg vandamál sem fylgja hinum svokallaða „íslenska útvegg“, byggingaraðferð sem einkennist af steinsteyptum veggjum sem eru einangraðir að innan. Slíkir veggir eru sérstaklega viðkvæmir fyrir steypuskemmdum vegna þess að steypan er óvarin frá veðri og vindum.   Markmið verkefnisins var að rannsaka þá grotnunarferla sem íslenski útveggurinn verður fyrir og síðan stilla upp og bera saman mismunandi varðveitingaraðferðir með aðstoð hita og rakaflæði greiningar forritinu WUFI® Pro.    Niðurstöður og helstu lærdómar Ævar greinir að íslenski útvegurinn hafi almennt mjög hátt rakastig – oft yfir hættumörkum (>85% RH) – og að veðurálag spili þar stærsta hlutverkið.   Helstu niðurstöður sýna meðal annars: Loftræst klæðning að utan  án viðbótar einangrunar dugar til að vatnsverja steypu en útþornun steypunnar verður enn afskaplega hæg útaf hitastigi hennar Viðbótareinangrun að utan  – jafnvel allt niður í 25 mm – getur skilað miklum árangri við að stuðla að útþornun steypunnar. Múreinangrunarkerfi  reyndist áhrifarík lausn í byggingum þar sem ekki er heimilt að breyta útliti. Lykilþáttur í árangri er hækkun á hitastigi steypunnar , sem stuðlar að útþornun og dregur úr skemmdavöldum. „Ævar hefur skilað mjög vönduðu og hagnýtu verkefni sem endurspeglar frábæra innsýn í byggingareðlisfræði og raunhæfar lausnir fyrir íslenskar aðstæður. Hann bætir við teymið okkar dýrmætri sérþekkingu og við hlökkum til áframhaldandi samstarfs,“ segir leiðbeinandi Ævars í verkefninu, Böðvar Bjarnarsson sem er byggingatækni- og byggingaeðlisfræðingur og einn af eigendum VERKVISTAR.   Böðvar Bjarnason og Ævar Kærnested hjá VERKVIST Hugsar til framtíðar eldri bygginga Með þessu verkefni leggur Ævar til mikilvægt framlag til umræðunnar um viðhald og verndun eldri bygginga á Íslandi – og sýnir skýrt hvernig samtvinna má fræði, hugbúnað og hagnýta reynslu í þágu sjálfbærrar byggingarmenningar. Það er sérstaklega ánægjulegt að verkefnið tengist beint verkefnum sem Ævar hefur sinnt hjá Verkvist og nýtist þannig strax í hagnýtri notkun.   Við óskum Ævari innilega til hamingju með áfangann og hlökkum til áframhaldandi samstarfs. Framtíð íslenskrar byggingartækni er björt með fagfólk eins og Ævar í sínu teymi.